Rev 15 | KhmKCB | STEP | បន្ទាប់មក ខ្ញុំ ឃើញ ទីសំគាល់ មួយ ទៀត ដែល ធំ ហើយ អស្ចារ្យ នៅ លើ មេឃ គឺមាន ទេវតា ប្រាំពីរ កាន់ គ្រោះកាច ប្រាំពីរ ដែលជាគ្រោះកាច ចុងក្រោយ ដ្បិត សេចក្ដី ក្រោធ របស់ ព្រះជាម្ចាស់ បាន សម្រេច ដោយសារ គ្រោះកាច ទាំងនោះ ។

Revelation of John 15

1 បន្ទាប់មកខ្ញុំឃើញទីសំគាល់មួយទៀតដែលធំហើយអស្ចារ្យនៅលើមេឃគឺមានទេវតាប្រាំពីរកាន់គ្រោះកាចប្រាំពីរដែលជាគ្រោះកាចចុងក្រោយដ្បិតសេចក្ដីក្រោធរបស់ព្រះជាម្ចាស់បានសម្រេចដោយសារគ្រោះកាចទាំងនោះ។ 2 ខ្ញុំបានឃើញមានដូចជាសមុទ្រកែវលាយជាមួយភ្លើងហើយពួកអ្នកដែលបានឈ្នះសត្វសាហាវនោះនិងរូបចម្លាក់របស់វាព្រមទាំងលេខឈ្មោះរបស់វាកំពុងឈរនៅលើសមុទ្រកែវនោះទាំងកាន់ពិណរបស់ព្រះជាម្ចាស់ 3 ពួកគេច្រៀងចម្រៀងរបស់លោកម៉ូសេជាបាវបម្រើរបស់ព្រះជាម្ចាស់និងចម្រៀងរបស់កូនចៀមថា៖ «ឱព្រះអម្ចាស់ជាព្រះដ៏មានព្រះចេស្ដាលើអ្វីៗទាំងអស់អើយ! ស្នារព្រះហស្ដរបស់ព្រះអង្គធំហើយអស្ចារ្យណាស់ឱព្រះមហាក្សត្រនៃជនជាតិទាំងឡាយអើយ! ផ្លូវរបស់ព្រះអង្គសុចរិតហើយពិតត្រង់ 4 ឱព្រះអម្ចាស់អើយ! តើមានអ្នកណាមិនកោតខ្លាចហើយមិនថ្វាយសិរីរុងរឿងដល់ព្រះនាមរបស់ព្រះអង្គ? ដ្បិតមានតែព្រះអង្គប៉ុណ្ណោះដែលបរិសុទ្ធ។ ជនជាតិទាំងអស់នឹងចូលមកហើយថ្វាយបង្គំព្រះអង្គព្រោះសេចក្ដីសុចរិតរបស់ព្រះអង្គបានសំដែងឲ្យឃើញហើយ»។ 5 ក្រោយពីហេតុការណ៍ទាំងនេះខ្ញុំបានឃើញព្រះវិហារនៅស្ថានសួគ៌ដែលជារោងនៃសេចក្ដីបន្ទាល់បានបើកចំហ 6 ហើយទេវតាទាំងប្រាំពីរដែលកាន់គ្រោះកាចទាំងប្រាំពីរក៏ចេញពីព្រះវិហារមកទាំងស្លៀកពាក់សំពត់ទេសឯកយ៉ាងស្អាតហើយភ្លឺក៏ពាក់ខ្សែក្រវាត់មាសនៅដើមទ្រូងផង។ 7 ពេលនោះសត្វមានជីវិតមួយក្នុងចំណោមសត្វមានជីវិតទាំងបួនបានប្រគល់ពានមាសប្រាំពីរដល់ទេវតាទាំងប្រាំពីរដែលមានពេញដោយសេចក្ដីក្រោធរបស់ព្រះជាម្ចាស់ដ៏មានព្រះជន្មរស់អស់កល្បជានិច្ច 8 ព្រះវិហារក៏បានពេញដោយផ្សែងចេញពីសិរីរុងរឿងរបស់ព្រះជាម្ចាស់និងពីព្រះចេស្ដារបស់ព្រះអង្គហើយគ្មាននរណាអាចចូលទៅក្នុងព្រះវិហារបានទេរហូតទាល់តែគ្រោះកាចទាំងប្រាំពីររបស់ទេវតាទាំងប្រាំពីរនោះចប់សព្វគ្រប់សិន។